ايام زمان
واللمه الحلوه.
والسهره الجميله.
وحكاوي الجده والقعده على النجيله...
.
الحكاوي اللي فالبرد تدفي.
والعشوه البسيطه اللي للكل تكفي.
وراكية النار (الدفايه) اللي نتلف حواليها.
وبراد الشاي عالولعه اللي تشفي..
وليالي الشتا اللي من المغرب فبيوتنا نتكن ونحكي حكاوي.
وفيلم الساعه 7.
وصيف زمان له بردو حكاوي.
الصيف اللي كان مجمع جيراننا.
كنا ندخل اي حاره نلاقي فكل ركن قعده ولمه.
ايام زمان كان فيها خير. والخير كتير.
كنت تاكل من زرعة إيديك.
ولو جيت فيوم للهم شيلت! يحسو إللي ليك.
كنت تلاقي اللي تفضفض معاهم ويسمعوك.
وف حزنك يخفوا عنك ويفرحوك.
مش تيجي تتكلم معاهم . علشان رسالة الواتس يوقفوك.
بيوت زمان!
بيوت زمان كانت جدرانها طين.
وقلوب اللي فيها من دهب.
وفرن العيش مكانش غاز. كان بردو طين.
والبوتجاز كان بردو طين. اسمه (كانون) .
اما غازنا كان (الحطب).....
..
والسرير كان طوب وطين. أو كنبتين مضمومين.
والمراتب كانت قش رز. بس كنا بننام مرتاحين...
.
والعيد دا كان فرحه كبيره.
والجلابيه الجديده.
والمسدسات البلاستيك اللي طولقهه خرز. والعديه.
ايوه العديه اللي من الجده تفرح.
كانت فسحنا ف الغيطان.
والجلابيه بالطين تتوسخ .. وامي تفرح..
.
وشهر الصيام. . كان له طله عجيبه. .كان له روايح.
كنا بنجهزله قبله بأسبوعين.
ونلم من الشارع فلوس.
العيل اللي يلون ورق. والبنت اللي تجيب عجينه فطبق.
ونجهز زينتنا ونعلقها عالبيوت.
. والفانوس كان بالورق...
.
ورمضان يهل ضيه والهلال.
والصحور كان عيش وجبنه.
والفطار. الكل ياكل من نفس الطبق..
واللي كانت تطبخ طبخه حلوه كانت تودي للجيران.
المهم ييجي الطبق..
كنا ناخد البريزه والريال. ونجري على بقال حارتنا.
ونولع ف سلك المواعين. ونضرب بومب وطلق.
ونصحي اللي فبيوتنا...
.
ايام زمان كان فيها خير. والخير كتر.
..
لا كنا نسمع عن رفع دعم . ولا كنا بنهين الكبير.
...
ماتوا جدودنا.
ماتوا جدودنا ولف الزمن والخير يقل.
والبركه اللي كانت فالبيوت راحت خلاص.
والشباب منظرهم فالشوارع بقا شيئ يعل.
. . والخير يقل.
والبيوت اللي كانت بالطين طلعت عماير.
وكلام الجيران على بعضهم بقى شيء يشل.
. . والخير يقل.
والقلوب اللي كانت من دهب قلبت ل طين.
والنور اللي كان مالي الشوارع أصبح جحيم.
.
والفرن اللي كان بالحطب. والبتجاز اللي أصله كانون.!
بقو إزاز وتاتش. وغساله بتنشف هدوم.
.
والاكل اللي كنا نشم ريحته من باب شارعنا بقا طعمه ماسخ.
والحكاوي اللي بتجمع جيراننا. بقت أعراض صبايا.
تجميعها هايف من غير هدف. . مقصودها راسخ.
والصغير هان الكبير.
. والخير خلاص فينا انعدم.
والغني داس عالفقير.
.هايجيله يوم الندم.
.
والفلوس كترت يابوي وبركتها قلة.
كنت زمان تاخد الجنيه. ماتعرفش تجيب ايه ولا ايه.
تمشي بيه تحس انك ملك. بس خلاص الاخره هلت.
.........
.لقد جف بئر المبادئ والقيم.
.واوشك جفاف بئر العفاااف.
.وطفح بئر القذاره.
.وطفح الكيل من وسع الزمم.
.
#بقلمي/محمد أشرف السيد.
ليست هناك تعليقات:
إرسال تعليق