((حالة كرب))
ماليش غير ربي يخرجني
من حالتي الكرب
***
وضميري اللي مصدق يصحى
ومابطل ضرب
***
قام لخبط ذنبي ف حسناتي
والشرق ف غرب
***
فوق هم العقل المستكفي
أهو شن الحرب
***
عايز أصرخ وأخرج من جلدي
وأنا جلدي سجون
***
وضميري اللي اتحرر منى
بيصفي ديون
***
مدبوح وبيرقص ويغني
وبيطلب عون
***
من عقل إتبرئ من فعله
وعامل مجنون
***
والفكر اللي بشكله عجبني
ع الأرض يكون
***
يا ضميري ليه بتعذبني
ولعقلي تخون
***
ما انت اللي مفارق وسايبني
في الضلمه أهون
***
ليه جاي تتنطط على عقلي
وإنت المغبون
***
ومضاربه بتحصل على بابك
والخوف بواب
***
بين عقلي وقلبي وأفكاري
وضمير كان غاب
***
كام صوت جوايه مبهدلني
وفتح لي حساب
***
وسؤال عن عمري بيشغلني
وملهش جواب
***
إيه حال الكبش اللي إتربى
وف وسط كلاب
***
وديابه بتحرس أغنامها
بقانون الغاب
***
والكل إتدهول وإتفرج
من عقب الباب
***
والحق ف باطل يتمرمط
والمرعى دواب
***
ياخدوا اللي ف ايدي وجابرني
لأكون كداب
***
ازاي بس أخرج من ذاتي
دا حياتي عذاب
***
ومرار الحلق اللي إتصفى
وبيروي ركاب
والطبع بغلبه بيتطبع
والغلب أبواب
والكلب اتربي ع الغالي
وغاليهم خاب
🖋️بقلم الشاعر /خالد موسى السيد
ليست هناك تعليقات:
إرسال تعليق